Enver Robelli si editorialist i serbiana.com

Rubin Gashi

Pas opinionit të pamatur për Mimoza Kusarin, të shprehur nga Shefqet Krasniqi në një emision televiziv mbi një nga kandidatët e balotazhit në qytetin e Gjakovës, shpërtheu një vërshim mediatik komentesh të mbushura me spekulime, ashtu si gjithmonë në të tilla raste. Pa hyrë në karakterin e prononcimit të Shefqet Krasniqit apo spekulimit mbi motivet e tij, na ra në sy një reagim i gazetarit Enver Robelli në murin e tij të facebookut ku, pasi e identifikon imam Krasniqin si shef i Alkaidas dhe “ambasador te Serbisë”, shpërthen me nervozizëm duke e quajtur mbështetjen e tij për znj. Kusari si përpjekje për ta fetarizuar fushatën vendore në Gjakovë, e deri përballje midis Islamit dhe Krishterimit: “Meka kundër Vatikanit”. Kjo gjë e bën Robellin të shfryjë duke e quajtur botën shqiptare perverse, ndërsa individë si Krasniqi “kriminelë fetarë”.

Mund të themi se ky reagim ngërthen një pozicion të rrezikshëm për bashkëjetesën e bashkësive fetare në përgjithësi. Siç mund të shihet në foto, reagimi i tij shkon përtej binarëve të një gjykimi kritik të matur, duke shfryrë me një gjuhë urrejtjeje, ndërkohë që faktet prej të cilave niset ndërtohen mbi përfytyrime spekulative të cilat paraqet si të vërteta definitive.

Fillimisht, me etiketimin e Krasniqit si “shefi i Al-Kaidës në Kosovë”, Robelli përcjell idenë se në Kosovë ka prani të Al-kaidës, e pastaj ai na tregon edhe se cili qenka shefi i saj. E gjithë kjo nuk është gjë tjetër pos një eko e asaj që tash disa vite përpiqet të përcjellë në opinionin ndërkombëtar e djathta ekstreme serbe e mbledhur tek web faqja serbianna.com apo ekstremistët bigot të së djathtës, si Christopher Delisio tek libri The Threat of Radical Islam to Europe and the West apo krimineli Andreas Breikevik në citimet të shpeshta që bën mbi Kosovën në manifestin terrorist të tij.

Nuk është hera e parë që Enver Robelli hedh teza të tilla dhe shumë shpesh shkrimet e tij mbi Islamin reflektojnë cektësi e madje edhe manipulim. Ditë më parë në shkrimin e tij të botuar tek Koha Ditore me titullin Fakirë fetarë dhe ekspertë të mishit të kalit, pa pasur asnjë informacion të qartë dhe pa asnjë analizë të matur, nxitohet të mediatizojë idenë e terrorizmit shqiptar në Siri. Gjithashtu ai akuzon Myftiun e Kosovës për mosdistancim nga ata shtetas të Kosovës që kanë shkuar të luftojnë në Siri, ndërkohë që në të vërtetë Tërnava është prononcuar në një intervistë në emisionin “Jeta në Kosovë” për këtë çështje, një muaj përpara shkrimit.

Përtej kritikave që E-Zani ka bërë ndaj prononcimeve të papërgjegjshme të Shefqet Krasniqit kohë pas kohe, ne konsiderojmë se qendrimet e Enver Robellit janë riciklim i diskurseve të së djathtës ekstreme gjithandej nëpër Evrope dhe si riprodhim i asaj që tash sa kohë Serbianna.com shkruan rreth islamit në Kosovë. Këto qendrime janë po aq të papërgjegjeshme dhe cenojnë mirekuptimin mes komuniteteve në Kosovë, duke krijuar përfytyrime të gabuara të bazuara mbi perceptime subjektive dhe spekulime të cilat nuk mund t’i rrijnë karshi evidencës, e për rrjedhojë provokojnë krijimin e anatemimit të një komuniteti fetar. Si të tilla, ato nuk i shërbejnë aspak një klime të shëndetshme për zhvillimin e shoqërisë shqiptare në Kosovë.