Kisha Katolike kundra Kim Mehmetit dhe Islamit

Promovimi i librit të Kim Mehmetit në Kosovë është pasuar me reagime të ashpra nga Kisha Katolike e Kosovës si dhe nga disa politikanë. Citojmë nga Express:

Deklarata e shkrimtarit Kim Mehmeti se Islami e ka shpëtuar shqiptarinë ka ngjallur jo pak reagime në opinion.

Kancelari i Ipeshkvisë së Kosovës Don Shan Zefi kundërshton ashpër këtë deklaratë të Mehmetit, të bërë të dielën gjatë promovimit të librit të tij me titull “Shkupi”.

Don Shan Zefi ka thënë të hënën për Gazetën Express se realiteti është pikërisht e kundërta çka ka deklaruar shkrimtari Mehmeti.

“Shqiptarinë nuk e ka shpëtuar islamizmi, por është Kisha Katolike ajo që ka mbajtur gjallë fijet e shqiptarisë”, tha Don Shan Zefi.

Sipas tij, është islamizmi, konkretisht Perandoria Osmane, që ka shkatërruar gjithë trashëgiminë materiale, kulturore dhe shpirtërore të shqiptarëve.

“Ky është një fakt historik që nuk mund ta mohon askush”, shtoi ai, të hënën.

Vërejmë këtu se teksa Kim Mehmeti është një shkrimtar e eseist nga më të njohurit në Maqedoni, ai nuk ka lidhje zyrtare apo nuk shërben si zëdhënës i asnjë institucioni musliman. Në të kundërt, Don Shan Zefi – autori i këtyre komenteve kundra Islamit në Kosovë – është kancelari i Ipeshkvisë së Kishës Katolike të Kosovës.

E kemi thënë më parë se mitilogjia e tolerancës fetare ka marë fund dhe Kisha Katolike, së bashku me një sërë politikanësh – nga presidentja e poshtë – janë kontribuesit kryesorë të retorikës së tensionit fetar.

Në anën tjetër, Kim Mehmeti nuk ka bërë asnjë sulm kundra feve të tjera dhe ideja se islamizimi ka penguar asimilimin sllav në veri nuk është një ide as e re e aq më pak e habitshme.

Don Shan Zefi vë në theks të veçantë kontributin e Kishës Katolike në ruajtjen e kombit.

“Kisha katolike ka qenë rojë e kombit shqiptar e asesi Perandoria Osmane dhe islamizmi i shqiptarëve”, deklaron ai.

Gjithashtu, disfatizmi dhe statusi, përherë difensiv, i Bashkësisë Islame të Kosovës në këtë klimë atakimesh kundra Islamit në Kosovë është vërtet për të ardhur keq dhe besojmë se do kontribuojë në shtimin e tensionit fetar.

Në takimin e organizuar nga lëvizja VetëVendosje Kim Mehmeti citohet të ketë thënë:

 “Absolutisht, matematikisht, mund të dëshmohet, edhe nëpërmjet asaj që e thash ma parë, se islamizmi e ka shpëtuar shqiptarinë në disa vise shqiptare, absolutisht! Unë ua dëshmoj me këtë: ortodoksët shqiptarë nuk i keni, katolikët shqiptarë nuk i keni në Shkup. I keni vetëm shqiptarët myslimanë”, tha Mehmeti.

Sipas Express:

Për këtë deklaratë ka reaguar edhe deputeti i Partisë Demokratike të Kosovës Berat Buzhala, duke e quajtur poshtërsi promovimin e Librit “Shkupi” të Kim Mehmetit. Ai ka reaguar përveç ndaj deklaratës së shkrimtarit edhe ndaj Lëvizjes Vetëvendosje si njëra nga organizatoret e promovimit. Deputetit Buzhala, kjo i është dukur poshtërsi, dhe duke ironizuar me këtë takim, që e quan interpelancë, Buzhala mes rreshtash madje ka kritikuar edhe PDK-në dhe të gjithë spektrin politik.

“Pra, më lejoni ta përsëris: PDK dhe gjithë spektri politik vendor vuajnë nga padituria, kurse Vetëvendosje nga poshtërsia. Pra “ne” jemi injorant e këta janë të poshtër. Këtë herë, poshtërsinë e vet, dhe tendencën për të mos zgjedhur mjete për të ardhur deri te pushteti dhe deri te vota Lëvizja Vetëvendosja e tregoi me ‘interpelancën’ qe e zhvilluan me Kim Mehmetin”, ka shkruar Buzhala, në rrjetin social “Facebook”.

Ky është qëndrimi i zakonshëm me të cilin jemi mësuar nga politikanët e Kosovës. Sigurisht, këta lloj politikanësh nuk kanë asgjë për të thënë për deklaratat agresive dhe ekstremiste të klerit katolik të Kosovës. VetëVendosja, nga ana e saj, nga mbështetur librin e Kim Mehmetit.

Gjatë këtij promovimi, është zhvilluar po ashtu edhe një debat për rëndësinë e Shkupit në planin gjithëkombëtar, ku autori i këtij teksti bashkë me Glauk Konjufcën, nënkryetar në Kuvendin e Kosovës, kanë vlerësuar se Shqiptarët janë fajtorë për sllavizmin e Shkupit.

Konjufca ka thënë për Express se në një shoqëri të lirë dhe demokratike, secili intelektual i artikulon dhe i mbron qëndrimet e tij.

“Kështu bën edhe Kim Mehmeti”, tha Konjufca.

“Lëvizja Vetëvendosje nuk mban përgjegjësi për fjalën publike të intelektualëve, prandaj pyetja juaj fsheh një mendësi shumë të rrezikshme”, tha Konjufca.

“Ne e promovuam librin e tij ‘Shkupi’. Ky është një libër shumë i mirë dhe me vlera kombëtare”, ka deklaruar Nënkryetari i Kuvendit nga kjo lëvizje.